Hukum Jatuah Hakim Babeleng

Judul Lagu : Hukum Jatuah Hakim Babeleng
Ciptaan : Zalmon

Salapan anak yo nan den kurehi
Lah abih pikia, lah abih pikia siang jo malam
Untuak sikolah nan jo mangaji
Rengek nyo anak hati den runyam

Babaua tipu yo nan jo tepo
Mangko bagaluik, mangko bagaluik tangka jo gaduah
Den harok tungku lai ka barasok
Tapaso denai rampok jo bunuah

Dek mato galok pandangan kalam
Hati tatutuik aka tabanam
Mangko tajadi karajo haram
Sinan tabalanggu jari tangan

Sukun jatuah kalawi sempeang
Jatuah badarai jo sularo nyo
Hukum jatuah hakim babeleang
Ka pinjaro juo badan jadi nyo

Manangih lundak den saik pisau
Apo ka tenggang, apo ka tenggang si kulik ari
Tibo mamang sarato risau
Mangana untuang di baliak tarali

Dingin dingin tembok pinjaro
Dingin manusuak, dingin manusuak ka dalam tulang
Saba lah dulu ondeh nak sayang
Abak manabuih sagalo doso

Coiko bana badan mularaik
Saparo mati mancari makan
Hukum balaku ka urang bansaik
Ka urang kayo baa kok garan

Anak kanduang sibiran tulang
Tingga lah dulu anak jo mande
Putuih sikolah apo ka tenggang
Abak takuruang indak babateh